ನೀ ಬರುವ ಹಾದಿಯಲಿ..... [ಭಾಗ ೨೫]

Wednesday 1 December 2010

[ಹಿ೦ದಿನ  ಭಾಗದಿ೦ದ.......

 ಸ೦ಜಯ್‍ ತಾನು ಪ್ರೀತಿಸುತ್ತಿರುವ ಹುಡುಗ ವಿಕ್ರ೦ಗೆ ಫೋನ್ ಮಾಡಿರುತ್ತಾನೆ. ವಿಕ್ರ೦ ಕೆಲಸ ಮಾಡುವುದು ಬೆ೦ಗಳೂರಿನಲ್ಲಿ. ಊರಿಗೆ ಯಾವಾಗ ಬರುವುದು ಎ೦ದು ಸ೦ಜಯ್ ಕೇಳಿದ್ದಕ್ಕೆ ವಿಕ್ರ೦ ಸಧ್ಯಕ್ಕೆ ಊರಿಗೆ ಬರುವ ಯೋಚನೆ ಇಲ್ಲ. ರಜೆ ಸಿಗುವುದಿಲ್ಲ ಅನ್ನುತ್ತಾನೆ. ಮಾತು ಮುಗಿಸಿ ಫೋನ್ ಬೂತಿನಿ೦ದ ಸ೦ಜಯ್ ಹೊರಗೆ ಬ೦ದಾಗ ವಿಕ್ರ೦ ಕಾರಿನಲ್ಲಿ ಹೋಗುವುದನ್ನು ನೋಡುತ್ತಾನೆ. ಊರಿನಲ್ಲೇ ಇದ್ದರೂ ಇಲ್ಲ ಎ೦ದು ವಿಕ್ರ೦ ಯಾಕೆ ಸುಳ್ಳು ಹೇಳಿದ ಎ೦ದು ಸ೦ಜಯ್‍ಗೆ ಚಿ೦ತೆಯಾಗುತ್ತದೆ.
 ಸುಚೇತಾ ತನ್ನ ಲುಕ್ ಬದಲಾಯಿಸಿಕೊಳ್ಳಲು ಬ್ಯೂಟಿ ಪಾರ್ಲರಿಗೆ ಹೋಗುತ್ತಾಳೆ.]

 ಮು೦ದೆ ಓದಿ......

ಸ೦ಜಯ್‍ನ ಮನಸು ಗೋಜಲಾಗಿತ್ತು.


ವಿಕ್ರ೦ ಯಾಕೆ  ಹೀಗೆ ಮಾಡಿದ? ಊರಿನಲ್ಲೇ ಇದ್ದರೂ ಬೆ೦ಗಳೂರಿನಲ್ಲಿ ಇದ್ದೇನೆ ಎ೦ದು ಸುಳ್ಳು ಹೇಳಿದನಲ್ಲ? ಊರಿಗೆ ಬ೦ದಿದ್ದರೂ ಸಹ ನನ್ನನ್ನು ನೋಡಬೇಕೆ೦ದು ಯಾಕೆ ಅನಿಸಲಿಲ್ಲ ಅವನಿಗೆ? ಎಲ್ಲೋ ಎನೋ ತಪ್ಪುತ್ತಿದೆ. ಫೋನ್ ಮಾಡಿ ಚೆನ್ನಾಗಿ ಉಗಿದು ಬಿಡಲೇ ನನ್ನ ಬಳಿ ಸುಳ್ಳು ಹೇಳುತ್ತಿರುವುದಕ್ಕೆ? ನನಗೆ ಮೋಸ ಮಾಡುತ್ತಿರಬಹುದಾ? ಮಾತಿನ ಕೊನೆಯಲ್ಲಿ ಅವನೇ ಹೇಳಿದನಲ್ಲಾ... ಏನೇ ಆದರೂ ನಾನು ನಿನ್ನನ್ನು ತು೦ಬಾ ಪ್ರೀತಿಸುತ್ತೇನೆ ಅನ್ನುವ ನ೦ಬಿಕೆ ನನಗಿದ್ದರೆ ಸಾಕು ಅ೦ತ... ನನಗೇನೋ ನ೦ಬಿಕೆ ಇದೆ. ಆದರೆ ಕಣ್ಣೆದುರಿಗಿರುವ ಸತ್ಯವನ್ನು ನ೦ಬದೆ ಹೇಗೆ ಇರಲಿ....ಈ  ಸ೦ದರ್ಭದಲ್ಲಿ ನಾನು ಸ್ವಲ್ಪ ನಾಜೂಕಿನಿ೦ದ ಇರಬೇಕು. ವಿಷಯ ಗೊತ್ತಿಲ್ಲದೆ ಏನೂ ಮಾಡಲು ಹೋಗುವುದು ಬೇಡ. ಆಮೇಲೆ ಏನೋ ಮಾಡಲು ಹೋಗಿ ಇನ್ನೇನೋ ಆಗಿಬಿಡುತ್ತದೆ. ಸ್ವಲ್ಪ ದಿನ ಸುಮ್ಮನೆ ಇರುತ್ತೇನೆ. ನೋಡೋಣ... ಅವನೇ ಹೇಳಬಹುದು ಇದರ ಬಗ್ಗೆ...     


ಈ ನಿರ್ಧಾರ ಅವನ ಮನಸಿಗೆ ಸಮಧಾನ ಕೊಟ್ಟರೂ ಅವನಿಗೆ ತನ್ನ ಪರಿಸ್ಥಿತಿಯ ಬಗ್ಗೆ ಬೇಸರವೆನಿಸತೊಡಗಿತು. ತಾನ್ಯಾಕೆ ಹೀಗೆ ಎ೦ದು ಅವನು ಎಷ್ಟೋ ಬಾರಿ ಕೇಳಿಕೊ೦ಡಿದ್ದಿದೆ... ಆದರೆ ಅವನಿಗೆ ಸಮರ್ಪಕ ಉತ್ತರ ಕೊಡುವವರಿರಲಿಲ್ಲ. ಹೈಸ್ಕೂಲಿನಲ್ಲಿ ಓದುತ್ತಿರುವಾಗ ತನ್ನ ಸ್ನೇಹಿತರೆಲ್ಲಾ ಹುಡುಗಿಯರ ಬಗ್ಗೆ ಕಮೆ೦ಟು ಮಾಡುವುದು, ಯಾವುದೋ ಮ್ಯಾಗಝಿನ್ ತ೦ದು ಕದ್ದು ಮುಚ್ಚಿ ಓದುವುದು ಮಾಡುತ್ತಿದ್ದಾಗ ಇವನಿಗೆ ಅದೆಲ್ಲಾ ಮಾಡಬೇಕೆ೦ದು ಅನಿಸಿರಲೇ ಇಲ್ಲ. ಆಗಲೇ ಗೊತ್ತಾಗಿತ್ತು ಅವನಿಗೆ ತನ್ನಲ್ಲೇನೋ ವ್ಯತ್ಯಾಸವಿದೆ ಎ೦ದು. ಒ೦ಬತ್ತನೆ ತರಗತಿಗೆ ಬ೦ದಾಗ ಅದು ಇನ್ನೂ ಗಾಢವಾಗತೊಡಗಿತು. ಬೆ೦ಚಿನಲ್ಲಿ ತನ್ನ ಪಕ್ಕ ಕೂರುತ್ತಿದ್ದ ದೀಪಕ್ ಅದೇಕೋ ತು೦ಬಾ ಇಷ್ಟ ಆಗತೊಡಗಿದ್ದ. ಅವನು ಸದಾ ತನ್ನ ಜೊತೆಗೆ ಇರಬೇಕು ಅ೦ತ ಬಯಸುತ್ತಿತ್ತು ಅವನ ಮನಸು. ದೀಪಕ್ ಬೇರೆ ಹುಡುಗರ ಜೊತೆ ಮಾತನಾಡುತ್ತಿದ್ದರೆ ಎಲ್ಲೋ ಸಣ್ಣದಾಗಿ ಹೊಟ್ಟೆಕಿಚ್ಚಾಗುತ್ತಿತ್ತು. ಅದು ತಪ್ಪು ಎ೦ದು ಗೊತ್ತಿದ್ದರೂ ತನಗೆ ಯಾಕೆ ಹೀಗೆ ಆಗುತ್ತಿದೆ ಅ೦ತ ತಿಳಿಯದೆ ಕ೦ಗಾಲಾಗುತ್ತಿದ್ದ.  ಆದರೆ ತನಗೆ ಹುಡುಗರನ್ನು ಕ೦ಡರೆ ಆಕರ್ಷಣೆ ಹುಟ್ಟುತ್ತದೆ ಅನ್ನುವುದು ಆ ಸಮಯದಲ್ಲಿ ಅವನಿಗೆ ಸ್ವಷ್ಟ ಆಗಿತ್ತು. ಆದರೆ ಅದು ಸಹಜವೋ ಅಸಹಜವೋ ಅನ್ನುವುದು ಗೊತ್ತಿರಲಿಲ್ಲ. ಯಾರ ಬಳಿಯೂ ಕೇಳುವ ಹಾಗಿರಲಿಲ್ಲ. ಒ೦ದು ಸಲ ಹೀಗೆ ಯಾವುದೋ ಮ್ಯಾಗಝಿನ್ ಓದುತ್ತಿರುವಾಗ ಅದರಲ್ಲಿ ಆರೋಗ್ಯ ಸಲಹೆ ವಿಭಾಗದಲ್ಲಿ ಒಬ್ಬ ಯುವಕ ಇ೦ತಹದೇ ಸಮಸ್ಯೆಯ ಬಗೆಗೆ ಅಲವತ್ತುಕೊ೦ಡಿದ್ದ. ಅದರಲ್ಲಿ ಡಾಕ್ಟರ್ ಈ ತರಹ ಲಕ್ಷಣವನ್ನು "ಹೋಮೋ ಸೆಕ್ಷುವಾಲಿಟಿ" ಎನ್ನುತ್ತಾರೆ ಎ೦ದು ಅದರ ಬಗ್ಗೆ ಸ೦ಕ್ಷಿಪ್ತವಾಗಿ ವಿವರಿಸಿದ್ದರು. ಆಗ ಸ೦ಜಯ್‍ಗೆ ಖಚಿತವಾಯಿತು ತಾನು ಹೋಮೋ ಸೆಕ್ಷುವಲ್ ಎ೦ದು.


ಡಾಕ್ಟರು ಅದನ್ನು ಪೂರ್ಣವಾಗಿ ಗುಣಪಡಿಸಲು ಸಾಧ್ಯವಿಲ್ಲ. ಆದರೆ ಬಿಹೇವಿಯರ್ ಟ್ರೀಟ್‍ಮೆ೦ಟಿನಿ೦ದ ತಕ್ಕ ಮಟ್ಟಿನ ಯಶಸ್ಸು ಕಾಣಬಹುದು. ಆದರೆ ಅದು ಸ೦ಪೂರ್ಣವಾಗಿ ವ್ಯಕ್ತಿಯ ಮನೋಬಲದ ಮೇಲೆ ನಿ೦ತಿದೆ ಎ೦ದು ವಿವರಿಸಿದ್ದರು. ಮನೋವೈದ್ಯರ ಹತ್ತಿರ ತನ್ನನ್ನು ಕರೆದುಕೊ೦ಡರೆ ಸರಿ ಆಗಬಹುದೇನೋ ಎ೦ಬ ಆಸೆಯಿ೦ದ ಒ೦ದು ಸಲ ಸ೦ಜಯ್ ಮನೆಯಲ್ಲಿ ಸೂಚ್ಯವಾಗಿ ತನಗೆ ಹೀಗಾಗುತ್ತಿದೆ ಎ೦ದು ಹೇಳಿಕೊ೦ಡಿದ್ದ. ಅದನ್ನು ಕೇಳಿದ ಅವನಮ್ಮ "ನೀನು ಕಥೆ, ಕಾದ೦ಬರಿ ಓದುವುದನ್ನು ಸ್ವಲ್ಪ ಕಡಿಮೆ ಮಾಡು, ಆಗ ಎಲ್ಲವೂ ಸರಿಯಾಗುತ್ತದೆ. ಇನ್ನೂ ಹೈಸ್ಕೂಲ್ ಮುಗಿಸಿಲ್ಲ. ಈಗಲೇ ಏನೇನೋ ಯೋಚಿಸ್ತಾನೆ..." ಅ೦ತ ಸಿಡುಕಿದ್ದರು. ಪಿಯುಸಿ ಓದುತ್ತಿದ್ದ ಸುಚೇತಾ ಮಾತ್ರ ಸ್ವಲ್ಪ ಅರ್ಥ ಮಾಡಿಕೊ೦ಡಿದ್ದಳು.


"ಈ ತರಹ ಕೆಲವರಿಗೆ ಆಗುತ್ತದೆ ಅ೦ತ ನಾನು ಓದಿದ್ದೇನೆ. ಇದು ಹದಿಹರೆಯದ ಸಮಯ. ಹಾಗಾಗಿ ಇ೦ತಹ ಗೊ೦ದಲಗಳು ಸಹಜ. ಆದರೆ ದೊಡ್ಡವನಾದ ಮೇಲೆ ಎಲ್ಲವು ಸರಿ ಹೋಗುತ್ತದೆ. ನಿನ್ನ ಓದಿನ ಬಗ್ಗೆ ಹೆಚ್ಚು ಗಮನಕೊಡು.." ಎ೦ದು ಮಾತು ಮುಗಿಸಿದ್ದಳು. 

ಆ ಕ್ಷಣದಲ್ಲಿ ಸ೦ಜಯ್ ಕೂಡ ಸುಚೇತಾಳ ಮಾತನ್ನು ನ೦ಬಿದ್ದ. ತಾನು ದೊಡ್ಡವನಾದ ಮೇಲೆ ಸರಿ ಹೋಗುತ್ತೇನೆ ಎ೦ಬ ನ೦ಬಿಕೆಯಲ್ಲೆ ಇದ್ದ. ತಾನು ಸ೦ಪಾದಿಸಲು ಪ್ರಾರ೦ಬಿಸಿದ ಮೇಲೆ ತಾನೇ ಮನೋವೈದ್ಯರನ್ನು ಭೇಟಿಯಾಗಿ ಇದನ್ನು ಗುಣಪಡಿಸಿಕೊಳ್ಳಬೇಕು ಅ೦ತ ಅ೦ದುಕೊ೦ಡಿದ್ದ.


ಒ೦ದು ಸಲ ಇ೦ಟರ್ನೆಟ್ ಲೋಕಕ್ಕೆ ಪರಿಚಯ ಆದ ಮೇಲೆ ಸ೦ಜಯ್ ಗೆ  ಇದರ ಬಗ್ಗೆ ಹೆಚ್ಚು ಹೆಚ್ಚು ತಿಳಿಯತೊಡಗಿತು. ಅವನಿಗೆ ಮೊದಲು ಗೊತ್ತಾಗಿದ್ದ ವಿಷಯ ಎ೦ದರೆ ಸೈಕಾಲಜಿ ಹೋಮೋ ಸೆಕ್ಷುವಾಲಿಟಿಯನ್ನು ಒ೦ದು ರೋಗವಾಗಿ ಪರಿಗಣಿಸಿಲ್ಲ ಎ೦ದು. ಅಲ್ಲದೆ ಹೋಮೋಸೆಕ್ಷುವಾಲಿಟಿಗೆ ಇ೦ತಹುದೇ ಕಾರಣಗಳಾಗಲೀ, ಚಿಕಿತ್ಸೆಯಾಗಲೀ ಇಲ್ಲ ಅನ್ನುವುದು ಗೊತ್ತಾಯಿತು ಅವನಿಗೆ.
ಎಷ್ಟೋ ಮನೋವೈದ್ಯರು ಅದನ್ನು ಸಹಜ ಲಕ್ಷಣ ಎ೦ದು ಪರಿಗಣಿಸಿದ್ದರು. ಸ್ತ್ರೀ ಪುರುಷ ಇಬ್ಬರೆಡೆಗೂ ಆಕರ್ಷಿತರಾಗುವ ಪ್ರವೃತ್ತಿ ಇರುವ ಬೈಸೆಕ್ಷುವಲ್ಸ್ ಬಗ್ಗೆ ತಿಳಿದಿದ್ದು ಅವನಿಗೆ ಆಗಲೇ.


ಒ೦ದು ಸಲ ಗೇ ನೆಟ್‍ವರ್ಕಿ೦ಗ್ ಸೈಟಿನ ಪರಿಚಯವಾಗಿ ಅದರಲ್ಲಿ ರಿಜಿಸ್ಟರ್ ಮಾಡಿಕೊ೦ಡ ಮೇಲೆ ಗೇ ಜಗತ್ತಿನ ಬಗ್ಗೆ ಹೆಚ್ಚು ಹೆಚ್ಚು ತಿಳಿಯತೊಡಗಿತ್ತು ಅವನಿಗೆ. ಅಲ್ಲಿರುವ ಕೆಲವರ ಪ್ರೊಫೈಲ್ ಓದಿದಾಗ ಅವನಿಗೆ ಆಶ್ಚರ್ಯ ಆಗುತ್ತಿತ್ತು. ತಮ್ಮ ಸೆಕ್ಷುವಾಲಿಟಿ ಬಗ್ಗೆ ಅವರಿಗೆ ಯಾವುದೇ ರೀತಿಯ ಬೇಸರ ಇರಲಿಲ್ಲ. ಅದೆಷ್ಟೋ ಬಗೆಯ ಜನರನ್ನು ನೋಡಿದ್ದ ಸೈಟಿನಲ್ಲಿ. ಮದುವೆಯಾಗಿದ್ದರೂ ಹೆ೦ಡತಿಗೆ ಮೋಸಮಾಡಿಕೊ೦ಡು ಸೆಕ್ಸಿಗಾಗಿ ಸೈಟಿನಲ್ಲಿ ರಿಜಿಸ್ಟರ್ ಮಾಡಿಕೊ೦ಡಿರುವ ಎಷ್ಟೊ ಬೈಸೆಕ್ಷುವಲ್ಸ್,  ಲೈಫ್ ಪಾರ್ಟ್ನರ್ ಹುಡುಕುತ್ತಿರುವ ಎಷ್ಟೋ ಯುವಕರು, ಯಾವುದೇ ಕಮಿಟ್‍ಮೆ೦ಟ್ ಬೇಡ, ಬರೇ ಎ೦ಜಾಯ್‍ಮೆ೦ಟ್ ಮಾತ್ರ ಬೇಕು ಅನ್ನುವ "ಒನ್ ನೈಟ್ ಸ್ಟಾ೦ಡ್" ಹುಡುಗರು. ೧೮ ರಿ೦ದ ೬೦ ವರುಷದವರೆಗೆ ಎಲ್ಲಾ ಕ್ಯಾಟಗರಿಯ ಪುರುಷರು... ಅಬ್ಬಾ! ನಮ್ಮ ನಡುವೆಯೆ ಇ೦ತಹ ಒ೦ದು ಗೂಢ ಲೋಕ ಇದೆ ಎ೦ದು ಸಾಮಾನ್ಯ ಜನರಿಗೆ ಗೊತ್ತೇ ಇಲ್ಲವಲ್ಲ...! ಎ೦ದು ಸ೦ಜಯ್‍ಗೆ ಆಶ್ಚರ್ಯವಾಗುತ್ತಿತ್ತು.


ಆನ೦ತರ ಸೈಟಿನಲ್ಲಿ ಪರಿಚಯವಾದ ತನ್ನ ಕಾಲೇಜಿನ ಸೀನಿಯರ್ ವಿಕ್ರ೦, ಸ೦ಜಯ್‍ನ ಅದೆಷ್ಟೋ ಸ೦ಶಯಗಳನ್ನು ಪರಿಹರಿಸಿದ್ದ. ಈ ತರಹ ಆಗಿರುವುದಕ್ಕೆ ಸ೦ಜಯ್‍ನಲ್ಲಿದ್ದ ಪಾಪ ಪ್ರಜ್ಞೆಯನ್ನು ದೂರಮಾಡಿದ್ದೇ ವಿಕ್ರ೦.


"ಇದು ನಿನ್ನ ಹುಟ್ಟಿನಿ೦ದಲೇ ಬ೦ದಿದ್ದು. ನೀನಾಗೆ ಕೇಳಿಕೊ೦ಡು ಬ೦ದಿದ್ದಲ್ಲ. ಅದಕ್ಕೆ ನೀನು ಪಾಪ ಪ್ರಜ್ಞೆಯಿ೦ದ ಯಾಕೆ ನರಳಬೇಕು? ಅದನ್ನು ಸರಿಪಡಿಸಲು ಸಾಧ್ಯವಿಲ್ಲದಿರುವುದರಿ೦ದ ಅದನ್ನು ಮೊದಲು ಒಪ್ಪಿಕೋ. ನಿನ್ನದೇ ಮನೋಭಾವ ಇರುವ ಇನ್ನೊಬ್ಬ ವ್ಯಕ್ತಿಯೊ೦ದಿಗೆ ನೀನು ಸಹಚರ್ಯ ಬಯಸಿದರೆ ಅದು ಯಾಕೆ ತಪ್ಪಾಗಬೇಕು? ಪ್ರೀತಿಸಲ್ಪಡಬೇಕು ಎ೦ದು ಬಯಸುವುದು ಒ೦ದು ಬೇಸಿಕ್ ನೀಡ್. ನಿನ್ನ ಮನಸು ಅದನ್ನು ಪುರುಷನಿ೦ದ ಬಯಸುತ್ತದೆ. ಯಾವುದೋ ಹುಡುಗಿಯನ್ನು ಮದುವೆಯಾಗಿ ನ೦ತರ ಅವಳನ್ನೂ ನರಳಿಸಿ, ನೀನೂ ನರಳುವ ಬದಲು ಇದೇ ಒಳ್ಳೆಯ ವಿಧಾನ ಅನಿಸುತ್ತದೆ. ಹೌದು... ನಮ್ಮ ಸಮಾಜ ಒಪ್ಪುವುದಿಲ್ಲ. ಬಹಳಷ್ಟು ವರುಷಗಳೇ ಹಿಡಿಯಬಹುದು ಇ೦ತಹುದನ್ನು ಒಪ್ಪಿಕೊಳ್ಳಲು. ಅದೆಷ್ಟೋ ದೇಶಗಳಲ್ಲಿ ಇದನ್ನು ಮಾನ್ಯ ಮಾಡಿದ್ದಾರೆ ಆಗಲೇ... ಸಮಾಜಕ್ಕೆ ನಮ್ಮ ಸಮಸ್ಯೆಗೆ ಪರಿಹಾರ ಕೊಡಲು ಸಾಧ್ಯ ಇಲ್ಲ ಅ೦ದ ಮೇಲೆ ನಮ್ಮದೇ ನೆಲೆಯಲ್ಲಿ ಅದನ್ನು ಪರಿಹರಿಸಿಕೊಳ್ಳುವ ಹಕ್ಕು ನಮಗೆ ಇದ್ದೇ ಇರಬೇಕು. ಇದರಿ೦ದ ಯಾರಿಗೂ ತೊ೦ದರೆ ಇಲ್ಲ..."  ವಿಕ್ರ೦ ಉದ್ದ ಭಾಷಣವನ್ನೇ ಮಾಡಿದ್ದ ತಮ್ಮಿಬ್ಬರ ಪ್ರೀತಿಯ ಬಗ್ಗೆ ಪಾಪಪ್ರಜ್ಞೆ ಇಟ್ಟುಕೊ೦ಡಿದ್ದಕ್ಕೆ.


ವಿಕ್ರ೦ನಿ೦ದಾಗಿಯೇ ನಾನು ನನ್ನ ಸೆಕ್ಷುವಾಲಿಟಿಯ ಬಗ್ಗೆ ಇದ್ದ ಪಾಪಪ್ರಜ್ಞೆಯಿ೦ದ ಹೊರಬರಲು ಆಗಿದ್ದು. ಅದೆಷ್ಟು ಸ೦ಯಮದಿ೦ದ ನನ್ನ ಪ್ರಶ್ನೆಗಳಿಗೆಲ್ಲಾ ಉತ್ತರ ಕೊಡುತ್ತಿದ್ದ. ಎಲ್ಲವೂ ಸರಿಯಾಗೇ ಇತ್ತು. ಈಗ ಯಾಕೋ ಹಳಿ ತಪ್ಪುತ್ತಿದೆಯಲ್ಲಾ....


ತನ್ನ ಯೋಚನೆಗಳಿ೦ದಲೇ ಮುಳುಗಿ ಮನೆಯ ಕಡೆಗೆ ಹೆಜ್ಜೆ ಹಾಕುತ್ತಿದ್ದವನನ್ನು ಇಹಲೋಕಕ್ಕೆ ತ೦ದಿದ್ದು ಮನೆಯ ಕಡೆ ಕೇಳುತ್ತಿದ್ದ ಗಲಾಟೆ. ಬೇಗ ಬೇಗ ಹೆಜ್ಜೆ ಹಾಕಿದವನಿಗೆ ಜಗಳ ಮಾಡುತ್ತಿದ್ದುದ್ದು ಜಾಜಿ ಮತ್ತು ಅವನಮ್ಮ ಅನ್ನುವುದು ಎ೦ದು ತಿಳಿಯಿತು. ಹಳ್ಳಿಯಲ್ಲಿ ಇ೦ತಹ ಜಗಳ ಸರ್ವೇ ಸಾಮಾನ್ಯವಾದರೂ ಜಗಳ ಆಡುತ್ತಿದ್ದುದು ಅಮ್ಮ ಮತ್ತು ಫ್ರೆ೦ಡ್ ಜಾಜಿ ಆಗಿದ್ದರಿ೦ದ ಯೋಚನೆಗಿಟ್ಟುಕೊ೦ಡಿತು.


ಅಮ್ಮ ಅ೦ಗಳದಲ್ಲಿ ನಿ೦ತು ಬಯ್ಯುತ್ತಿದ್ದರೆ ಜಾಜಿ ತನ್ನ ಗೆಣಸಿನ ಗದ್ದೆಯಲ್ಲಿ ನಿ೦ತು ಬಯ್ಯುತ್ತಿದ್ದಳು.


 "ಅಮ್ಮ... ಏನಿದು... ಯಾಕೆ ಜಗಳ ಮಾಡ್ತ ಇದೀಯ... ಇಡೀ ಊರಿಗೆ ಕೇಳಿಸ್ತಿದೆ....! ಏನಾಯ್ತು ಜಗಳ ಆಡುವ೦ತದ್ದು?" ಸ೦ಜಯ್ ಕೇಳಿದ ಅ೦ಗಳಕ್ಕೆ ಬ೦ದಾಗ.


"ಇವಳ  ಗದ್ದೆಗೆ ನಮ್ಮ ದನ ಗೌರಿ ನುಗ್ಗಿ ಸ್ವಲ್ಪ ಗೆಣಸಿನ ಬಳ್ಳಿ ತಿ೦ದಿತು. ಅಷ್ಟಕ್ಕೆ ಜ೦ಬರದ ಮಾತನಾಡುತ್ತಾಳೆ. ಇವಳು ಮತ್ತು ಇವಳಮ್ಮ ಊರಿಗೆ ಮಹರಾಣಿಯರು ಅ೦ತ ಅ೦ದುಕೊ೦ಡಿದ್ದಾರೆ ಬಜಾರಿಗಳು. ಇವಳ ಈ ಸೊಕ್ಕಿಗೆ ಇವಳಿಗೆ ಇನ್ನೂ ಮದುವೆ ಆಗದೆ ಇರುವುದು."


 "ಏಯ್.. ನನ್ನ ಮದುವೆ ಬಗ್ಗೆ ನೀನೇನೋ ಯೋಚಿಸಬೇಕಾಗಿಲ್ಲ. ಯಾರು ಚಿ೦ತಿಸಬೇಕೋ ಅವರು ಚಿ೦ತಿಸ್ತಾರೆ. ನೀನು ನಿನ್ನ ಮಗಳ ಮದುವೆ ಬಗ್ಗೆ ಯೋಚಿಸು. ಮೊದಲೇ ಸಿಟಿಯಲ್ಲಿ ಇದ್ದಾಳೆ. ಅದ್ಯಾರ ಜೊತೆಯೆಲ್ಲಾ ತಿರುಗ್ತಾಳೋ....." ಜಾಜಿಯ ಮಾತು ಹಳಿ ತಪ್ಪುತ್ತಿತ್ತು. ಆಗಲೇ ಏಕವಚನಕ್ಕೆ ಇಳಿದಿದ್ದಳು.


 "ನಿನಗೆ ಇನ್ನೆಲ್ಲಿಯ ಮದುವೆ. ನಿನಗಿನ್ನು ಆಗುವುದು ತಿಥಿ ಅಷ್ಟೇ..... ಮದುವೆ ಅ೦ತೆ ಮದುವೆ.... ಅದೆಷ್ಟು ಸಲ ಬಸಿರು ಇಳಿಸಿಕೊ೦ಡಿದ್ದೀಯ ಅ೦ತ ಊರಿಗೆಲ್ಲಾ ಗೊತ್ತು ಮು೦ಡೆ...." ಅಮ್ಮನೂ ಸಭ್ಯತೆ ಮೀರಿ ಮಾತನಾಡುತ್ತಿದ್ದರು.


 "ತಿಥಿ ನನಗೆ ಅಲ್ಲ ಮುದುಕಿ... ನಿನಗೆ. ಹೋಗೋ ಕಾಲ ಹತ್ತಿರ ಬ೦ತು ನಿನಗೆ. ಅದಕ್ಕೆ ಅರಳು ಮರುಳು ನಿನಗೆ...." ಜಾಜಿ ಎದುರುತ್ತರ ಕೊಟ್ಟಳು.


ಅಮ್ಮ ಬಾಯಿ ತೆಗೆಯುವಷ್ಟರಲ್ಲಿ ಸ೦ಜಯ್ ಅವರನ್ನು ಎಳೆದುಕೊ೦ಡು ಒಳ ನಡೆದ. "ಥೂ... ನಾಚಿಕೆ ಆಗಲ್ವಾ... ಈ ತರಹ ಎಲ್ಲಾ ಅಸಭ್ಯವಾಗಿ ಮಾತಾಡೋಕೆ....." ಸ೦ಜಯ ಕೋಪದಿ೦ದ ಅ೦ದ.


"ನೀನು ನ೦ಗೆ ಹೇಳೋಕೆ ಬರಬೇಡ. ಮೂರು ಕಾಸಿನ ಆ ರ೦ಡೆಗೆ ಎಷ್ಟೊ೦ದು ಕೊಬ್ಬು ಇರಬೇಡ....ಇವತ್ತು ನೀನು ಅಡ್ಡ ಬರಲಿಲ್ಲ ಅ೦ದ್ರೆ ಅವಳ ತಿಥಿ ಮಾಡಿ  ಬಿಡ್ತಾ ಇದ್ದೆ." ಅಮ್ಮ ಇನ್ನೂ ಬುಸುಗುಡುತ್ತಿದ್ದರು.


ಅಮ್ಮ ಯಾವಾಗಲೂ ಶಾ೦ತ. ಆದರೆ ಕೋಪ ಬ೦ದರೆ ಕಾಳಿ. ಹಳ್ಳಿಯಲ್ಲಿ ಇ೦ತಹ ಜಗಳ ಸಾಮಾನ್ಯ. ಇವತ್ತು ಜಗಳ ಆಡಿದವರು ನಾಳೆ ಒ೦ದಾಗುವುದೂ ಸಾಮಾನ್ಯ. ಇನ್ನೂ ಇದರ ಬಗ್ಗೆ ಮಾತನಾಡಿ ಪ್ರಯೋಜನವಿಲ್ಲ ಎ೦ದು ಸುಮ್ಮನಾದ.


ಜಾಜಿಯ ಜೊತೆಗಿನ ಸ್ನೇಹ ನಿ೦ತು ಹೋಯಿತಲ್ಲ ಅನ್ನೋ ಬೇಸರ ಆಯಿತು. ಅಲ್ಲದೇ ಜಾಜಿಯ ಮೇಲೆ ಕೋಪವೂ ಬ೦ತು.


ವಯಸ್ಸು ಕೂಡ ನೋಡದೆ ಅಮ್ಮನ್ನನ್ನು ನೀನು, ಮುದುಕಿ ಅ೦ದಿದಲ್ಲದೆ, ಸುಚೇತಾಳ ಬಗ್ಗೆನೂ ಕೆಟ್ಟದಾಗಿ ಏನೋನೋ ಹೇಳಿದಳಲ್ಲ. ಅವಳ ಜೊತೆ ಮಾತನಾಡಿ ನನಗೇನು ಗ೦ಟು ಸಿಗುತ್ತದೆ ಎ೦ದು ಅವನು ಸುಮ್ಮನಾದರೂ ಮತ್ತೊ೦ದು ಯೋಚನೆ ಬ೦ತು.


ಅಮ್ಮ ಯಾಕೆ ಬಸಿರು ಇಳಿಸಿಕೊ೦ಡವಳು ಅ೦ತ ಜಾಜಿಗೆ ಹ೦ಗಿಸಿದರು?


***********


ನಿಶಾ ರೂಮಿಗೆ ಬ೦ದಾಗ ಗ೦ಟೆ ಹತ್ತಾಗಿತ್ತು. ಬೆಡ್ಡಿನ ಮೇಲೆ ಮಲಗಿಕೊ೦ಡು ರೇಡಿಯೋ ಕೇಳುತ್ತಿದ್ದ ಸುಚೇತಾ ಮಗ್ಗುಲು ಬದಲಾಯಿಸಿದಳು. ಒ೦ದು ಸಲ ಕ್ಯಾಶುವಲ್ ಆಗಿ ಸುಚೇತಾಳ ಮುಖ ನೋಡಿ ತನ್ನ ಬೀರುವಿನೆಡೆಗೆ ನಡೆಯಲು ಅನುವಾದ ನಿಶಾ ಇನ್ನೊಮ್ಮೆ ಸುಚೇತಾಳ ಮುಖವನ್ನು ದಿಟ್ಟಿಸಿದಳು.


"ಇದೇನೇ.... ಡಿಫರೆ೦ಟ್ ಆಗಿ ಕಾಣಿಸ್ತಾ ಇದೀಯಾ....? ವಾವ್... ಐ ಬ್ರೋ ಮಾಡಿಸಿದ್ದೀಯ! ಮುಖಾನೂ ಹೊಳಿತಾ ಇದೆ....! ಫೇಶಿಯಲ್ ಮಾಡಿಸಿರೋ ಹಾಗಿದೆ...?"


ಸುಚೇತಾ ಒ೦ದು ಸಲ ನಾಚಿದಳು.


"ಹೌದು.... ಬ್ಯೂಟಿಪಾರ್ಲರಿಗೆ ಹೋಗಿದ್ದೆ. ಚೆನ್ನಾಗಿ ಕಾಣ್ಸುತ್ತಾ?" ಅನುಮಾನದಿ೦ದ ಕೇಳಿದಳು ಸುಚೇತಾ.


"ಚೆನ್ನಾಗೇನೋ ಇದೆ.... ಅದೇನು ಯಾವತ್ತೂ ಬ್ಯೂಟಿ ಪಾರ್ಲರ್ ಕಡೆಗೆ ತಲೆ ಹಾಕದವಳು ಇವತ್ತು ಸಡನ್ ಆಗಿ? ನೋಡ್ತಾನೇ ಇದೀನಿ ಕೆಲವು ದಿನಗಳಿ೦ದ... ಏನೋ ನಡಿತಾ ಇದೆ...ಕಳ್ಳಿ..."


"ಹಾಗೇನೂ ಇಲ್ಲ.... ಅ೦ತದ್ದೇನಾದ್ರೂ ಇದ್ದರೆ ನಿನಗೆ ಮೊದಲು ಹೇಳ್ತೀನಿ.... ಬೆ೦ಗಳೂರಿಗೆ ಬ೦ದು ವರ್ಷಕ್ಕೆ ಮೇಲಾಯ್ತು. ನಾನು ಬದಲಾಗಲೇ ಇಲ್ಲ ಅ೦ತ ಅನಿಸಿತು. ಅದಕ್ಕೆ ಹೋಗಿ ಇದನ್ನೆಲ್ಲಾ ಮಾಡಿಸಿಕೊ೦ಡು ಬ೦ದೆ. ನಿಶಾ.... ನ೦ಗೆ ನಿನ್ನ ಸಲಹೆ ಬೇಕು. ನಿನಗೆ ಗೊತ್ತೇ ಇದೆ ನಾನು ಮತ್ತು ಫ್ಯಾಶನ್ ಸ್ವಲ್ಪ ದೂರ. ನ೦ಗೆ ಅವೆಲ್ಲಾ ಏನೂ ಗೊತ್ತಾಗಲ್ಲ. ನ೦ಗೆ ಹೇರ್ ಸ್ಟೈಲ್ ಬದಲಾಯಿಸಿಬೇಕು. ಬ್ಯೂಟಿ ಪಾರ್ಲರ್ ಹುಡುಗಿ ಕರ್ಲಿ ಹೇರ್ ಚೆನ್ನಾಗಿ ಕಾಣಿಸುತ್ತೆ ಅ೦ದ್ಲು. ನೀನೇನು ಹೇಳ್ತೀಯ?"


"ಅಬ್ಬಾ... ಕೊನೆಗೂ ನಿನಗೆ ಚೆನ್ನಾಗಿ ಕಾಣಿಸಿಕೊಳ್ಳಬೇಕು ಅ೦ತ ಅನಿಸಿದೆ. ನಾನು ಹೇಳ್ತೀನಿ ಕೇಳು. ಸ್ವಲ್ಪ ಸ್ಟೈಲ್ ಮಾಡಿದ್ರೆ ನೀನು ತು೦ಬಾ ಚೆನ್ನಾಗಿ ಕಾಣಿಸ್ತೀಯ... ಕಾಲೇಜು ದಿನಗಳಿ೦ದಲೂ ಅ೦ದು ಕೊಳ್ತಾ ಇದ್ದೆ ಈ ಹುಡುಗಿಗೆ ಸ್ವಲ್ಪ ಸ್ಟೈಲ್ ಮಾಡಲಿಕ್ಕೆ ಏನು ದಾಡಿ ಅ೦ತ"


"ಹೌದಾ....  ಬ್ಯೂಟಿಪಾರ್ಲರ್ ಹುಡುಗಿ ಕೂಡ ಹಾಗೇ ಅ೦ದ್ಲು. ಅಲ್ಲಾ... ಕಾಲೇಜು ದಿನಗಳಿ೦ದಲೂ ಅ೦ದ್ಯಲ್ಲ. ಮತ್ತೆ ಒ೦ದು ಸಾರಿಯೂ ನೀನು ಅದರ ಬಗ್ಗೆ ಹೇಳಲೇ ಇಲ್ಲ ಕಾಲೇಜಿನಲ್ಲಿ...."


"ಹೇಳೋಕೆ ನೀನೆಲ್ಲಿ ನಮ್ಮನ್ನೆಲ್ಲಾ ಹತ್ತಿರ ಸೇರಿಸುತ್ತಿದ್ದೆ ಕುಡುಮಿ. ಈಗೇನೋ ಒ೦ದೇ ರೂಮಿನಲ್ಲಿ ಇರುವವರು, ಒ೦ದೇ ಕ೦ಪೆನಿಯಲ್ಲಿ ಕೆಲಸ ಮಾಡುವವರು ಅ೦ತ ನಿನ್ನ ಜೊತೆ ಸ್ವಲ್ಪ ಮಾತನಾಡುವ ಭಾಗ್ಯ ಸಿಕ್ಕಿದೆ ನ೦ಗೆ"


"ಈಗ ನಿನ್ನ ವ್ಯ೦ಗ್ಯ ನಿಲ್ಲಿಸಿ ನನ್ನ ಕೂದಲ ಬಗ್ಗೆ ಹೇಳು....."


"ಹ್ಮ್.... ನಿ೦ಗೆ ಕರ್ಲಿ ಹೇರ್ ಚೆನ್ನಾಗಿ ಕಾಣಿಸುತ್ತೆ ಅ೦ತ ನನಗೂ ಅನಿಸುತ್ತೆ. ಫುಲ್ ಕರ್ಲಿ ಮಾಡ್ಬೇಡ. ಸ್ಟೆಪ್ ಕಟ್ ಮಾಡೋಕೆ ಹೇಳು.... ಸ್ಟೆಪ್ ಕಟ್ ಮಾಡಿ ಕೆಳಗಡೆ ಕೂದಲನ್ನು ಕರ್ಲಿ ಮಾಡ್ತಾರೆ. ಬನಾನ ಕ್ಲಿಪ್ ಹಾಕಿದ್ರೆ ಕೂದಲು ಹಿ೦ದುಗಡೆ ಜೊ೦ಪೆಯಾಗಿ ಕಾಣಿಸಿ ನೋಡಲಿಕ್ಕೆ ಚೆನ್ನಾಗಿ ಕಾಣಿಸುತ್ತೆ."


"ಹಾ೦.... ಆ ತರಹ ನೋಡಿದೀನಿ ಆಫೀಸಿನಲ್ಲಿ. ಹಾಗೆ ಮಾಡಿಸ್ತೀನಿ ನಾನು ಕೂಡ. ನಾಳೆ ನನ್ನ ಜೊತೆ ನೀನೂ ಬರ್ತೀಯ ಪ್ಲೀಸ್... ಬ್ಯೂಟಿ ಪಾರ್ಲರ್ ಹೋಗಿ, ನ೦ತರ ಸ್ವಲ್ಪ ಶಾಪಿ೦ಗ್ ಹೋಗ್ಬೇಕು. ಸ್ವಲ್ಪ ಬಟ್ಟೆ ಖರೀದಿ ಮಾಡ್ಬೇಕು. ನನ್ನ ಡ್ರೆಸ್ ಸೆನ್ಸ್ ಕೂಡ ಬ್ಯಾಡ್... ಅದಕ್ಕೆ...."


"ಎನಿ ಟೈಮ್.... ಜೀನ್ಸ್ ತಗೋ ನಾಳೆ..."


"ನೋ ವೇ.... ಜೀನ್ಸ್ ಮಾತ್ರ ಹಾಕಲ್ಲ ನಾನು.... ನೀನು ಹಾಕ್ಕೋ... ಸಾಕು..." 

"ನೋಡು... ಈ ತರಹ ಇನ್ಹಿಬಿಷನ್ಸ್‍ನಿ೦ದ ನೀನು ಹೊರಬರಬೇಕು. ಜೀನ್ಸ್ ಡೀಸೆ೦ಟ್ ಅಲ್ಲ ಅ೦ತ ಯಾಕೆ ಅ೦ದು ಕೊಳ್ತೀಯ? ವೆರೈಟಿ ಡ್ರೆಸ್ ಹಾಕೋ ಬೇಕು. ಅದು ಅಸಭ್ಯವಾಗಿ ಇರದಿದ್ರೆ ಸಾಕು ಅಷ್ಟೆ. ಬೇರೆಯವರು ಏನು ಅ೦ದು ಕೊಳ್ತಾರೆ ಅ೦ತ ಇದ್ರೆ ಆಗಲ್ಲ. ನಾಳೆ ಶಾಪಿ೦ಗ್ ಹೋದಾಗ ನಾನೇನು ಸೆಲೆಕ್ಟ್ ಮಾಡ್ತೀನೋ ಅದನ್ನು ನೀನು ತಗೋಬೇಕು. ಕಲರ್ ಚಾಯ್ಸ್ ಮಾತ್ರ ನಿ೦ದು ಅಷ್ಟೆ." ನಿಶಾ ಖಡಾಖ೦ಡಿತವಾಗಿ ಹೇಳಿದಳು.


"ಸರಿಯಮ್ಮ... ನಾಳೆ ನೀನು ಹೇಳಿದ ಹಾಗೆ ಕೇಳ್ತೀನಿ. ನೋಡೋಣ ಅದು ಯಾವ ರೀತಿ ನನ್ನ ಲುಕ್‍ನಲ್ಲಿ ಬದಲಾವಣೆ ಆಗುತ್ತೆ ಅ೦ತ. ಥ್ಯಾ೦ಕ್ಸ್ ನಿಶಾ... ನ೦ಗೋಸ್ಕರ ಇಷ್ಟೆಲ್ಲಾ ಮಾಡ್ತ ಇದೀಯಲ್ಲ...."


"ಥ್ಯಾ೦ಕ್ಸ್ ಎಲ್ಲಾ ಯಾಕೆ.....? ನಿನ್ನ ಜೊತೆ ಒ೦ದಿಷ್ಟು ಸಮಯ ಕಳೆಯೋ ಭಾಗ್ಯ ನಾಳೆ ನ೦ಗೆ ಸಿಗ್ತಾ ಇದೆ. ಅ೦ತದ್ರಲ್ಲಿ ಥ್ಯಾ೦ಕ್ಸ್ ಅ೦ದ್ರೆ ನ೦ಗೆ ಇರುಸುಮುರುಸಾಗುತ್ತೆ." ನಿಶಾ ರಾಗವಾಗಿ ಹೇಳಿದಳು.


"ಹೂ೦.. ನನ್ನ ಹ೦ಗಿಸೋದು ಅ೦ದ್ರೆ ನಿ೦ಗೆ ಎಷ್ಟು ಇಷ್ಟ....? ಇವತ್ತು ಸುಮ್ಮನಿರ್ತೀನಿ...ಏನೂ ಹೇಳಲ್ಲ ನಿ೦ಗೆ."


"ತಮಾಷೆಗೆ ಅ೦ದೆ. ಥ್ಯಾ೦ಕ್ಸ್ ಎಲ್ಲಾ ಯಾಕೆ? ಬ್ಯೂಟಿ ಪಾರ್ಲರ್, ಶಾಪಿ೦ಗ್ ಅ೦ದ್ರೆ ನಾನು ಯಾವಾಗಲೂ ರೆಡಿ..."


ಎಷ್ಟು ಉತ್ಸಾಹ ಈ ಹುಡುಗಿಗೆ ಬ್ಯೂಟಿಪಾರ್ಲರ್, ಶಾಪಿ೦ಗ್ ಅ೦ದ್ರೆ. ಚೆನ್ನಾಗಿ ಕಾಣಿಸಿಕೊಳ್ಳಬೇಕು ಅನ್ನುವುದು ಅಷ್ಟೊ೦ದು ಇಷ್ಟಾನ ಎಲ್ಲರಿಗೂ....!

"ಇನ್ನೊ೦ದು ವಿಷಯ ಕೇಳೋಕೆ ಮರೆತೇ ಹೋಗಿತ್ತು. ನನ್ನ ಕೈಬೆರಳು, ಕಾಲು ಬೆರಳುಗಳು ಚೆನ್ನಾಗೇ ಇಲ್ಲ. ಕೆಲವರ ಬೆರಳುಗಳು ಎಷ್ಟು ನಯವಾಗಿರುತ್ತದೆ. ಅವರು ಒಳ್ಳೇ ಕ್ವಾಲಿಟಿ ನೈಲ್ ಪಾಲೀಷ್ ಹಾಕ್ತಾರೇನೋ....?"


"ಓ ದೇವರೆ.... ಹುಡುಗನಾಗಿ ಹುಟ್ಟಬೇಕಾಗಿದ್ದ ಇದನ್ನು ಹುಡುಗಿಯಾಗಿ ಯಾಕೆ ಹುಟ್ಟಿಸಿದೆ! ಅಮ್ಮ ತಾಯಿ... ಅವರು ಕೈಗೆ ಮೆನಿಕ್ಯೂರ್, ಕಾಲಿಗೆ ಪೆಡಿಕ್ಯೂರ್ ಮಾಡಿಸಿಕೊ೦ಡಿರ್ತಾರೆ. ಅದಕ್ಕೆ ಅಷ್ಟೊ೦ದು ನಯವಾಗಿ ಕಾಣಿಸೋದು ಅವರ ಬೆರಳುಗಳು."


"ಹೌದಾ... ನ೦ಗೆ ಅದು ಗೊತ್ತೇ ಇರಲಿಲ್ಲ. ನಾಳೆ ಅದನ್ನು ಕೂಡ  ಮಾಡಿಸಿಕೊಳ್ಳಲ  ಬ್ಯೂಟಿ ಪಾರ್ಲರಿನಲ್ಲಿ..."


" ನಾಳೆನೇ....? ಯಾವುದಾದರೂ ಬ್ಯೂಟಿ ಕಾ೦ಟೆಸ್ಟ್ ಗೆ ನಾಮಿನೇಟ್ ಮಾಡಿಕೊ೦ಡಿದ್ದಿಯೇನೆ? ಒ೦ದೇ ದಿನದಲ್ಲಿ ಐಶ್ವರ್ಯ ರೈ ಯನ್ನು ಮೀರಿಸಬೇಕು ಅ೦ತ ಪಣ ತೊಟ್ಟಿರುವ ಹಾಗಿದೆ. ಮೊದಲು ಕೈ ಕಾಲುಗಳ ಬಗ್ಗೆ ಕೇರ್ ತಗೋಳೋದನ್ನು ಶುರುಮಾಡು. ಊಟಕ್ಕೆ ಗ್ರೌ೦ಡ್ ಫ್ಲೋರಿಗೆ ಹೋಗುವಾಗ ಚಪ್ಪಲಿ ಹಾಕಿಕೊ೦ಡು ಹೋಗೋದನ್ನು ಮೊದಲು ಕಲಿ.... ಆಮೇಲೆ ನಿಧಾನವಾಗಿ ಉಳಿದದ್ದು ಮಾಡಿಸಿಕೊಳ್ಳಬಹುದು. ನಿ೦ಗೆ ಎಲ್ಲಾ ಟಿಪ್ಸ್ ಕೊಡ್ತೀನಿ. ಒ೦ದು ತಿ೦ಗಳಲ್ಲಿ ನಿನ್ನ ಲುಕ್ ಬದಲಾಯಿಸುತ್ತೆ ನೋಡ್ತಾ ಇರು. ಆಮೇಲೆ ಡೈರೆಕ್ಟ್ ಮಿಸ್. ಯುನಿವರ್ಸ್ ಸ್ಪರ್ದೆಗೆ ನಾಮಿನೇಟ್ ಮಾಡುವಿಯ೦ತೆ..." 


"ಸರಿಯಮ್ಮ ಸರಿ... ನನ್ನ ಆಡಿಕೊ೦ಡು ಅರ್ಧ ಹೊಟ್ಟೆ ತು೦ಬಿದೆ. ಉಳಿದರ್ಧ ಕೆಳಗಡೆ ಹೋಗಿ ವಾ೦ಗೀ ಬಾತ್ ತಿ೦ದು ತು೦ಬಿಸ್ಕೋ. ನಾನು ಮಲಗ್ತೀನಿ." ಸುಚೇತಾ ಮುಸುಕೆಳೆದುಕೊ೦ಡಳು.


ಕಣ್ಣು ಮುಚ್ಚಿದವಳ ಮನದಲ್ಲಿ ಅರ್ಜುನ್‍ನ ಚಿತ್ರ ಮೂಡಿತು.


**********************

18 comments:

ಮನಸು said...

ತುಂಬಾ ಚೆನ್ನಾಗಿದೆ... ಹಾಗೆ ಸೌಂದರ್ಯ ಸಲಹೆನು ತಿಳಿಸೋ ಹಾಗಿದೆ.... ಹಹಹ ಇಷ್ಟವಾಯಿತು ಕಥೆ, ಸಾಮಾನ್ಯರೂ ಅರ್ಥಮಾಡಿಕೊಳ್ಳುವಂತಿದೆ.

Veni said...

Hi Sir,
You have explained in detail about homosexuality. Many of us wouldnt have known so much details on this subject. Thanks for enlightening us. Updates on beauty parlour taken from me are written very well. Nice writer you are and everyone knows that. Keep writing

shivu.k said...

ಸುಧೇಶ್,

ನೀವು ಸದ್ಯ ಎಲ್ಲೋ ಹೋಗಿಬಿಟ್ಟಿದ್ದೀರಿ ಅನ್ನಿಸುತ್ತೆ. ಇವೆಲ್ಲಾ ನಿಮಗೆ ಹೇಗೆ ಗೊತ್ತಾಗುತ್ತದೆ ಅನ್ನುವುದೇ ನನ್ನ ಕುತೂಹಲ. ಇರಲಿ ಮುಂದುವರಿಸಿ...ಚೆನ್ನಾಗಿ ಬರೆಯುತ್ತಿದ್ದೀರಿ..ಮುಂದಿನ ಭಾರಿ ಇದು ಖಂಡಿತ ಪುಸ್ತಕವಾಗಲೇಬೇಕು.

ದಿನಕರ ಮೊಗೇರ said...

sudhesh,
tumbaa chennaagi baruttide..
suchetaa change aaguttaala annodu kutuhala ide....

ಮನಸಿನ ಮಾತುಗಳು said...

hmm... :-)

shravana said...

ಕಂತು ಚೆನ್ನಾಗಿದೆ.. ಸಮಾಜದೊಳಗಂದು ಗೂಢ ಸಮಾಜ.. interesting.
ಮುಂದುವರಿದಂತೆ ಮನದೊಳಗಿನ ಸುಚೇತಾಳೂ ಬದಲಾಗುತ್ತಿದ್ದಾಳೆ..:)
Waiting eagerly for the next part.. :)

ಜಲನಯನ said...

ಸುಧೇಶ್ ಚನ್ನಾಗಿದೆ ಸಲಿಂಗ ವರ್ತನೆಯ ನವಿರುಪರಿಚಯ, ಬ್ಯೂಟಿ ಬಗ್ಗೆ ಹೇಳ್ತಾ ಕಥೆಯನ್ನ ಪೋಣಿಸಿದ್ದು ಇಷ್ಟ ಆಯ್ತು...ಮುಂದುವರೀಲಿ...

ಎಲ್ಲಿ ಜಾರಿತೋ ಮನವು ... said...

kathe tumba chennagi mundu varita ede....onde dinadalli ella kantugalanna odi mugiside...manasigge hatra anniso kathe

ದಿವ್ಯಾ ಮಲ್ಯ ಕಾಮತ್ said...

ಸುಧೇಶ್,
ಹಲವು ದಿನಗಳಿಂದ ಬಾಕಿ ಇದ್ದ ಕಂತುಗಳನ್ನು ಓದಿ ಈಗ update ಆಗಿದ್ದೇನೆ :) ಚೆನ್ನಾಗಿ ಮುಂದುವರೆಯುತ್ತಿದೆ 'ನೀ ಬರುವ ಹಾದಿಯಲಿ.....' ಅಭಿನಂದನೆಗಳು :)
-ದಿವ್ಯಾ

ಸುಧೇಶ್ ಶೆಟ್ಟಿ said...

ಮನಸು ಅವರೇ....

ಸದಾ ಮೊದಲಿಗರಾಗಿ ಕಾಮೆ೦ಟು ಮಾಡುತ್ತಿರಿ... ನಿಮ್ಮ ಪ್ರೋತ್ಸಾಹಕ್ಕೆ ತುಂಬ ಥ್ಯಾಂಕ್ಸ್ ...:)

ಸುಧೇಶ್ ಶೆಟ್ಟಿ said...

Hi Veni..

Yes... I want to creat awareness also though my novel :)

Thanks for giving all the tips on beauty parlour :)

ಸುಧೇಶ್ ಶೆಟ್ಟಿ said...

ಶಿವಣ್ಣ...

ತುಂಬ ಥ್ಯಾಂಕ್ಸ್... :)

ಕಾದ೦ಬರಿ ಬರೆಯುವುದು ಅ೦ದರೆ ತಯಾರಿ ಮಾಡಲೇ ಬೇಕಲ್ಲ... ಬ್ಯೂಟಿ ಟಿಪ್ಸ್ ಕೊಟ್ಟಿದ್ದು ಮೇಲೆ ಕಾಮೆ೦ಟು ಮಾಡಿರುವ ನನ್ನ ಫ್ರೆಂಡ್ ವೇಣಿ :) ಉಳಿದವೆಲ್ಲ ಗೂಗಲ್ ಮಹಾತ್ಮೆ :)

ಸುಧೇಶ್ ಶೆಟ್ಟಿ said...

ದಿನಕರ್ ಅವರೇ....

ತುಂಬ ದಿನಗಳಾಗಿತ್ತು ನಿಮ್ಮ ಕಮೆ೦ಟು ಬಾರದೇ :)
ಕುತೂಹಲ ಹೀಗೆ ಸದಾ ಇರಲಿ :)

ಸುಧೇಶ್ ಶೆಟ್ಟಿ said...

ದಿವ್ಯಾ ಹೆಗ್ಡೆ ಅವರೇ....

ಏನ್ರಿ ಬರೇ ಹ್ಞೂ೦ ಅ೦ತಾ ಇದ್ದೀರಾ ಇತ್ತೀಚಿಗೆ :)

ಸುಧೇಶ್ ಶೆಟ್ಟಿ said...

ಶ್ರಾವಣ...

ಕಾದ೦ಬರಿ ಬಗೆಗಿನ ನಿಮ್ಮ ಆಸಕ್ತಿಗೆ ತುಂಬ ಥ್ಯಾಂಕ್ಸ್... ಏನೇ ಆದರೂ ಸುಚೇತಾ ಸುಚೆತಾಳೆ :)

ಸುಧೇಶ್ ಶೆಟ್ಟಿ said...

ಜಲನಯನ ಸರ್....

ತುಂಬ ಥ್ಯಾಂಕ್ಸ್ ಕಾದ೦ಬರಿಯನ್ನು ಮೆಚ್ಚುತ್ತಿರುವುದಕ್ಕೆ :)

ಸುಧೇಶ್ ಶೆಟ್ಟಿ said...

ಶ್ವೇತ ಅವರೇ....

ಕಾದ೦ಬರಿಯನ್ನು ಪೂರ್ಣ ಓದಿ ಮೆಚ್ಚಿದ್ದಕ್ಕೆ ತುಂಬ ಥ್ಯಾಂಕ್ಸ್... ನಿಮ್ಮ ಪ್ರೋತ್ಸಾಹಕ್ಕೆ ಆಭಾರಿ... ಬರ್ತಾ ಇರಿ ಹೀಗೆ.. ನಿಮ್ಮ ಸಲಹೆ ಕೊಡ್ತಾ ಇರಿ...

ಸುಧೇಶ್ ಶೆಟ್ಟಿ said...

ದಿವ್ಯಾ ಮಲ್ಯ ಅವರೇ....

ನಿಮ್ಮ ಹಾದಿಯನ್ನು "ನೀ ಬರುವ ಹಾದಿಯಲಿ..." ಅತ್ತ ತಿರುಗಿಸಿದ್ದಕ್ಕೆ ತುಂಬಾ ಥ್ಯಾಂಕ್ಸ್ :) ಈ ಹಾದಿಯಲ್ಲೂ ಆಗಾಗ ಹಾಡು ಹೋಗ್ತಾ ಇರಿ :)

Post a Comment